سمعناها كتير أوي وكلنا عارفين ان فيه حاجة اسمها لعنة الفراعنة،
بس هو ازاي يعني ناس ماتت من آلاف السنين ممكن يقدروا يقنعونا ب ده؟…
أشهر قصة في موضوع لعنة الفراعنة ده هي قصة مقبرة الملك توت عنخ آمون
اللي تم اكتشافها سنة 1922 على إيد العالم هاورد كارتر، أول حاجة لقوها في وشهم
أول ما فتحوا المقبرة هي الجملة دي “سيضرب الموت بجناحية السامين كل من يعكر صفو الملك”
عشان تبدأ أحداث غير مبررة أو مفهومة تحصلهم.
مبدئيا كده بسم الله الرحمن الرحيم في 40 واحد من العمال، الباحثين والعلماء اللي كانوا شغالين
على اكتشاف المقبرة وفتحها ماتوا فجأة لأسباب تافهة جدا واستحالة تكون صدفة إنها تحصلهم
كلهم في نفس الفترة، وبيقال ان وقت فتح المقبرة حصلت عاصفة رملية كبيرة جدا في المكان
وفيه صقر كان بيلف في وقتها فوق المقبرة (الصقر من الرموز المقدسة جدا عند الفراعنة).
ده غير إن يوم افتتاح المقبرة في واحد اسمه محمد زكريا كان مشارك في اكتشاف المقبرة
جاله حمى محدش من الدكاترة قدر يفهم سببها ولا نوعها ومات الساعة 12 بليل بالظبط
في نفس الوقت اللي النور قطع فيه في القاهرة كلها، وده اللي خلى الناس تربط كل الكلام
ده ببعض ويقولوا ان الملك بينتقم من اللي عكروا مزاجه وهو نايم.
